Mentres dure

Unamuno como alegoría. Salamanca, 1936. Atmósfera cargada e enfrontamentos ideolóxicos. Paisaxes evocadoras e pontes en perspectiva. Loitas polo mando no eido dos sublevados. Un individuo con baraka. Unha bandeira desleixada… E de fondo unha guerra civil que durou case mil días.

Por certo, hai máis fantasmas no Novelty.

María Estuardo

Unha muller forte. Unha católica enérxica. Unha muller políglota. Un ser traizoado. Unha mente intelixente. Bela e fermosa. Unha vontade vencida. Así presenta Josie Rourke -inspirándose na obra de John Guy– á raíña mártir María Estuardo, nun filme recentemente estreado.

A historia mergúllase no período 1561-1587, cando Isabel I era raíña protestante de Inglaterra e María se verá sometida a sucesivas conspiracións, nun mundo onde o dominio dos varóns era lei. Finalmente, fuxirá de Escocia a Inglaterra, e alí será definitivamente executada por orde da súa curmá.

O filme reclama a forza feminina de dúas raíñas orgullosas; canto a María, chaman a atención os seus earrings ao modo de María de Portugal… e o seu carisma.

Ötzi

Ötzi foi achado a unha altura de 3200 metros, perto do cumio de Similaun, nun lugar entre Austria e Italia. (…) Estábanse asentando entón a agricultura e a gandería, e con elas o comercio e o manexo de algúns metais (…). Coa sedentarización, os pobos ían medrando lentamente ata converterse en algo semellante a aglomeracións urbanas, aínda que as cidades eran aínda algo descoñecido nesa parte do mundo. Naquel intre, Europa non estaba en absoluto domesticada. (…)

Ötzi axúdanos a adentrarnos nun momento crucial para a humanidade: a revolución do Neolítico, cando os seres humanos comezaban a deixar atrás o mundo de cazadores recolleitadores e se xeralizaba a agricultura. (…)

O Home dos Xeos está cheo de respostas, mais tamén de preguntas: vintecinco anos de investigacións sobre o corpo permitiron resolver moitos misterios, aínda que aumentaron outros. Os científicos tardaron unha década en descobrer de que morrera e foi preciso un médico con moita experiencia, Paul Gostner, radiólogo do hospital de Bolzano, para atopar un detalle que pasara inadvertido ao resto dos observadores: unha punta de frecha á altura do ombreiro esquerdo. Ötzi fora asasinado polas costas.”

Guillermo Altares: Una lección olvidada.”

Despois das pesquisas científicas, chega o filme.

Victoria e Abdul

A raíña Victoria, ao final da súa vida, cae ¿namorada? dun servinte musulmán que vén da India.

O filme de Stephen Frears aproxímanos a unha época, adoptando o punto de vista preferente dos fastos da realeza, mergullándonos nunha historia descoñecida ata hai pouco tempo, que algo ten de reivindicativo canto á aproximación de amizade entre civilizacións, de superación dos estereotipos sociais e de “edulcoramento” dunha época colonial chea de clichés… E marabíllanos coa interpretación de Judi Dench, introdúcenos nos dispendios do xubileo, achéganos ao urdu. Unha experiencia interesante.

Crea un sitio web ou un blogue de balde en WordPress.com.

Subir ↑